Luk 11 | NdeIBE | STEP | Ngelinye ilanga uJesu wayekhuleka kwenye indawo. Wathi eseqedile, omunye wabafundi bakhe wathi kuye, “Nkosi, sifundise ukukhuleka, njengo-Johane owafundisa abafundi bakhe.”

Luke 11

UJesu Ufundisa Ukukhuleka

1 Ngelinye ilanga uJesu wayekhuleka kwenye indawo. Wathi eseqedile, omunye wabafundi bakhe wathi kuye, “Nkosi, sifundise ukukhuleka, njengo-Johane owafundisa abafundi bakhe.”

2 Wathi kubo, “Nxa likhuleka, alibokuthi: “ ‘Baba, kalidunyiswe ibizo lakho, umbuso wakho kawuze,

3 Siphe usuku ngosuku isinkwa sethu sansuku zonke.

4 Sithethelele izono zethu, ngokuba lathi siyabathethelela bonke abasonayo thina. Njalo ungasiholeli ekulingweni.’ ”

5 Wasesithi kubo, “Ake kuthi omunye wenu ulomngane, aye kuye phakathi kobusuku athi, ‘Mfowethu, akungeboleke izinkwa ezintathu,

6 ngoba umngane wami ophakathi kohambo uzofihla ikhanda kwami, kodwa kangilalutho engingamupha lona.’

7 “Besekusithi ongaphakathi aphendule athi, ‘Ungangikhathazi. Umnyango usukhiyiwe njalo mina labantwabami sesilele. Ngingezake ngivuke ngikuphe loba yini.’ 8 Ngiyalitshela ukuthi loba ubengafuni ukuvuka amuphe isinkwa ngokuba engumngane, kodwa ngenxa yokuphikelela kwendoda uzaze avuke amuphe konke akuswelayo.

9 “Ngakho ngithi kini: Celani lizaphiwa; dingani lizafumana; qoqodani lizavulelwa umnyango.

10 Ngoba wonke ocelayo uyaphiwa; lowo odingayo uyafumana; lakulowo oqoqodayo umnyango uyavulwa.

11 “Ngubani kini bobaba, okuthi nxa indodana yakho icela inhlanzi wena uyiphe inyoka na?

12 Loba icela iqanda uyiphe inkume na? 13 Nxa lina, elithi loba libabi, kodwa likwazi ukupha abantwabenu izipho ezilungileyo, pho uYihlo osezulwini uzabapha ngokudlulayo kangakanani uMoya oNgcwele kulabo abamcelayo!”

UJesu LoBhelizebhubhi

14 UJesu wayekhupha idimoni elaliyisimungulu. Lathi idimoni selisuka, indoda eyayiyisimungulu yakhuluma, ixuku labantu lamangala.

15 Kodwa abanye bathi, “Ukhupha amadimoni ngoBhelizebhubhi induna yamadimoni.”

16 Abanye bamlinga ngokumcela isiboniso esivela ezulwini.

17 UJesu wayeyazi imicabango yabo wasesithi kubo: “Lowombuso odabukeneyo uyadilika, lendlu edabukeneyo izakuwa. 18 Aluba uSathane edabukene phakathi, umbuso wakhe ungema kanjani na? Ngikutsho lokhu ngoba lithi mina ngikhupha amadimoni ngoBhelizebhubhi. 19 Pho, uma ngikhupha amadimoni ngoBhelizebhubhi, abalandeli benu bawakhupha ngobani? Yebo kambe, sekuyibo abazakuba ngabehluleli benu.

20 Kodwa nxa ngikhupha amadimoni ngomunwe kaNkulunkulu, lapho-ke umbuso kaNkulunkulu usufikile kini.

21 “Nxa indoda eqinileyo, ihlome yaphelela, ilinde indlu yayo, izimpahla zayo zivikelekile.

22 Kodwa kungahlasela olamandla kulayo ayehlule uyayemuka izikhali indoda le ebikade ithembele kuzo abesesahlukanisa impango.

23 “Lowo ongemanga lami umelana lami, lalowo ongabuthiyo lami uyachithiza.

24 “Lapho umoya omubi uphuma emuntwini, uyaphumputheka enkangala udinga ukuphumula kodwa ungakufumani. Ubususithi, ‘Ngizabuyela endlini engayitshiyayo.’ 25 Uthi ufika, ufumane leyondlu ithanyelwe yahlanzeka yalungiswa kuhle. 26 Ubusuhamba uyogwegwa eminye imimoya eyisikhombisa emibi okudlula wona, ingene ihlale khona. Isiphetho yikuthi isimo saleyondoda sizaba sibi kulesakuqala.”

27 Kwathi uJesu elokhu esakhuluma lezizinto, owesifazana wamemeza esexukwini wathi, “Ubusisiwe lowomama owakuzalayo wakondla.”

28 Waphendula wathi, “Kungenani, ababusisiweyo yilabo abalizwayo ilizwi likaNkulunkulu balilalele.”

Isibonakaliso SikaJona

29 Kwathi amaxuku elokhu esanda, uJesu wathi “Lesi yisizukulwane esixhwalileyo. Sifuna isibonakaliso esingummangaliso, kodwa kasisoze sibe khona ngaphandle kwesibonakaliso sikaJona. 30 Ngaleyondlela uJona aba yisibonakaliso ngayo kumaNineve, ngokunjalo iNdodana yoMuntu izakuba njalo kulesi isizukulwana. 31 INkosikazi yaseNingizimu izavuka ekwahlulelweni kanye labantu balesi sizukulwane ibalahle; ngokuba yeza ivela emaphethelweni omhlaba izokuzwa inhlakanipho kaSolomoni, kodwa manje lowo omkhulu kuloSolomoni usekhona lapha. 32 Abantu baseNineve bazaphakama kanye lalesi sizukulwane ekwahlulelweni basilahle; ngoba bona baphenduka uJona aze atshumayele, pho manje lowo omkhulu kuloJona usekhona lapha.

Isibane Somzimba

33 “Kakho olumathisa isibane abesesibeka ekusithekeni, kumbe ngaphansi komganu. Kodwa usibeka esiqobaneni saso, ukuze kuthi labo abangenayo babone ukukhanya. 34 Ilihlo lakho liyisibane somzimba. Nxa amehlo akho elungile umzimba wakho wonke ugcwele ukukhanya. Kodwa nxa emabi, umzimba wakho lawo ugcwele ubumnyama. 35 Qaphelani-ke ukuthi ukukhanya okuphakathi kwenu kakusumnyama. 36 Ngakho, nxa umzimba wakho wonke ugcwele ukukhanya, kungekho ingxenye esemnyameni, wonke uzakhanyiswa, kube njengokuba ukukhanya kwesibane kukukhanyisa.”

Izithithibaliso Eziyisithupha

37 UJesu eseqedile ukukhuluma umFarisi wamnxusa ukuthi azokudla laye; wasehamba wayakweyama etafuleni. 38 Kodwa umFarisi wananzelela ukuthi uJesu kaqalanga ngokugeza engakadli, kwammangalisa.

39 INkosi yathi kuye, “Uyabona, lina baFarisi lihlanza ngaphandle kwenkomitshi lomganu, kodwa ngaphakathi kwenu ligcwele ubuhwaba lobubi. 40 Lina bantu abayiziwula! Lowo owenza ingaphandle kenzanga lengaphakathi na?

41 Ngakho phanini lokho okungaphakathi komganu kwabampofu, lapho-ke konke kuzakuba sekuhlanzekile kini.

42 “Maye kini baFarisi, ngokuba lipha uNkulunkulu okwetshumi kwazo zonke izithelo zesivande senu kodwa lidele ukwenza okulungileyo kanye lokuthanda uNkulunkulu. Ngabe liyakwenza lokhu kodwa lingakuyekelanga okwetshumi.

43 “Maye kini baFarisi, ngokuba lithanda izihlalo eziqakathekileyo emasinagogeni njalo lithanda lokubingelelwa ezindaweni zokuthengisela.

44 “Maye kini, ngokuba linjengamadlinza angakhelwanga, abantu abahamba phezu kwawo bengazi ukuthi akhona.”

45 Omunye wezazi zomthetho wamphendula wathi, “Mfundisi, nxa usitsho njalo uyasithuka lathi.”

46 Waphendula uJesu wathi, “Lani zazi zomthetho, maye kini, ngokuba lethesa abantu ngemithwalo abangeke bayithwale, ikanti lani livele kalithi thiki ukubancedisa.

47 “Maye kini, ngokuba lakha amangcwaba abaphrofethi, bona ababulawa ngokhokho benu.

48 Ngakho lifakaza ukuthi liyakuvuma lokho okhokho benu abakwenzayo; bababulala abaphrofethi, lina-ke selisakha amangcwaba abo.

49 Ngenxa yalokhu, uNkulunkulu wathi, ngokuhlakanipha kwakhe, ‘Ngizabathumela abaphrofethi labaphostoli, abanye bazababulala abanye bazabaphatha ngochuku.’ 50 Ngakho lesisizukulwana yiso esizathwala umlandu wegazi labaphrofethi bonke elachithwayo, kulokhu kwadabuka umhlaba, 51 kusukela egazini lika-Abela kusiya egazini likaZekhariya, owabulawa phakathi laphakathi kwe-alithare lendlini engcwele. Yebo, ngiyalitshela, isizukulwana lesi sizakwetheswa umlandu wakho konke.

52 “Maye kini zazi zomthetho, ngokuba seliyivalile intuba yolwazi. Lina ngokwenu kalingenanga, laphinde lavimbela labo abebesithi bayangena.”

53 UJesu wathi esesuka lapho abaFarisi labafundi bomthetho base bephikisana laye kubi, sebemthela ngemibuzo, 54 bezama ukumgwenxa ngokunye ayengakutsho.